"90/60/90 ანუ გოგონა სლაიდიდან"

 

დღეს კიდევ ერთ ახალ ქართულ ფილმს "90/60/90 ანუ გოგონა სლაიდიდან"- ვუყურე .

სიმართლე გითხრათ ბევრს არაფერს მოველოდი , იმედგაცრუება რომ მეგრძნო და ამიტომაც არაფერი მიგვრძვნია საერთოდ.

ამ ამბავს ასე ვუყურებ - რაც არ უნდა იყოს მიხარია რომ საქართველოში კინოინდუსტრია ამოქმედდა და რაღაცეები ხდება, მაგრამ ეს კი უკვე მეორე საკითხია რამდენად საინტერესოა ეს ”რაღაცეები” ჩემთვის და ზოგადად მაყურებლისთვის.

მოკლედ არ მინდა კრიტიკის ქარცეცხლში გავახვიო რეჟისორი, მსახიობები და ფილმის როგორც შინაარსი ასევე ფორმა- ამიტომ მოდით ჯერ გავიგოთ რა უნდოდა რეჟისორს ამ ფილმით ეთქვა და დანარჩენი თქვენ შეაფასეთ ფილმის ნახვის შემდეგ   ( ვფიქრობ აუცილებლად უნდა ნახოთ თუნდაც იმიტომ რომ მერე თქვათ რომ არ უნდა გენახათ :)

გიგა აგლაძე  : ”მინდოდა გადამეღო ფილმი, რომლითაც მაყურებელს ოდნავ "გაფერადებულად" ვაჩვენებდი, თუ რა ხდება შოუბიზნესის იმ ნაწილში, რასაც "ფეშენი" ჰქვია. ფილმი "90/60/90 ანუ გოგონა სლაიდიდან" კომედიური მელოდრამა - ძალიან ლამაზი და ფერადია.”

მე ვისურვებდი რეჟისორს ეთქვა, რომ მას სურდა გაეკრიტიკებინა ”ფეშენ” საზოგადოება, ”ვითომ მაგარი ტიპები” , აფსურდული ელიტარული სტერეოტიპები - მერე რა რომ არ გამოუვიდოდა - უფრო მისაღები და საინტერესო გახდებოდა ფილმი პირადად ჩემთვის.

რა ხდება ფილმის სიუჟეტში? : ”ერთ-ერთი საავტომობილო კომპანიის წარმომადგენელ მდიდარ, ქალების მოყვარულ ვაჟს მოდელი გოგონა შეუყვარდება, მაგრამ გოგონას არ უყვარს. ბიჭი ქალის სამოსს იცვამს და სამოდელო სააგენტოში მიდის. მერე იქ რაღაცები ხდება... საბოლოოდ ყველაფერი გაირკვევა.ფილმი "ჰეფი ენდით" მთავრდება - გოგონა და ბიჭი ერთად რჩებიან.”

  ჰო გარკვეულწილად არის კომედიური მელოდრამის მცდელობა, მაგრამ რა ვქნა რომ რამდენჯერმე კინაღამ ჩამომეძინა? :) ან იმას რა ვუყოთ რომ სულაც არ მომწონს ვიღაც ცოლიანი მოღალატე მექალთანე პატარა ლამაზ გოგოს რომ გადაეკიდება და საბოლოოდ შეაბავს. ჰოლივუდურ მელოდრამებშიც კი იციან რომ ასეთი ტიპი ბოლოს კარგი უნდა გახდეს : )) რაც შეეხება ფილმის ”კომედიურ ნაწილს” -რომელშიც კაცი ასრულებს ქალის როლს , არც დინამიური და არც კომიკური ეპიზოდებითაა დახუნძლული და რეჟისორმა ”ტუტსის ეფექტით” - რა მიიტანა მაყურებლამდე მე პირადად ვერ მივხვდი .

მოკლედ რომ ვთქვათ ფილმი არც მელოდრამაა სამწუხაროდ და არც კომედია - რას ვიზამთ.

რაც შეეხება მსახიობებს- მათი პროფესიონალიზმის შეფასებისგან არ შეგაწყენთ თავს თუნდაც იმ მარტივი მიზეზის გამო რომ უმრავლესობა მათგანი საერთოდ არ არის მსახიობი :)

იხილეთ ფილმის ტრეილერი და ფილმის ნახვასაც გირჩევთ- ყველას თავისი აზრი და გემოვნება აქვს- იქნებ მოგეწონოთ კიდეც :)

ეს კი ფილმის რეცენზია

P.S. ფილმს ძალიან აკლია დინამიურობა  და ვფიქრობ შეიძლება სწორად შერჩეულ მუსიკას მაინც შეევსო ეს ნაკლი...